「呢度真系好高好靓呀」
小朋友站在水池旁兴奋地叫。
「望到好远呀」
「啲水咁冻」
「原来好浅架炸，我仲以为可以跳落去」
「好彩唔系行上黎炸，一定好辛苦」
在发生遇溺惨剧前，我半拉半氹地把小朋友赶离水池，领他们沿往山下的路走去，希望别把此处的清幽破坏得太过体无完肤。
暑假中的蒙民伟在装修，门口有一排水马和胶带围封。我看见楼梯旁还留一个空位，便走上了天台。
站在半身高的矮墙旁，看到了山城的一撮，还有更多错落在我身後的山中。
「睇埋呢度你谂住去边架？」朋友问我。
「会落lift然後落百万大道啦」
「咁快？」
「差唔多啦，山上面都唔系咁多野睇姐」
「情人路咁经典都唔行？」她半jian笑地看我。
「佢哋小学都未读完喎，咁快讲爱情呢啲嘢？等佢哋入到黎再慢慢领略啦，宜家讲晒，到时就唔浪漫啦」
「睇嚟你有啲故事要分享喎」
「边有！咪又系路一条，窄少少炸嘛，你求其一条行人路叫情人路都得啦」
朋友露出一副「你继续吹」的样子，没有答话。
***
「今晚个天好清喎」你在p跟我说。
「系咩？冇留意添」我有点敷衍地回应。
「不如出去睇星？」你提议。
「睇星？要去好远架？」我有点懒，不想出门。
「你系山区地方啦喎，仲要去边度！好近架炸」
「睇罗…….要去边度？」
「我过黎揾你，再带你去！」
「出面会唔会好冻？」
「带多件衫啦你，睇睇下可能冻」
「好啦，你就到同我讲，我落黎揾你」
我拿起今天早上穿去上课的夹层外套，不过仍选择踢上人字拖下楼去。
我站在温暖的玻璃门後等待熟悉的身影。
高挑的身影渐近，我推开玻璃门。
「咁快？」我问。
「揾你果阵已经行紧过嚟啦」你回应。
「哗你又知我得闲？」
「我约喎，有野做都变冇野做啦」
「下？边位呀你？」
「嘿，咁你宜家咪又系出左黎」
「我系咁啱冇野做姐，唔好讲到自己咁劲」
「你话咩咪咩罗，嘿嘿」
我们沿斜路行上山，寒露过後的十月，入夜後更见清凉，凉风沿海岸吹上来，还有一点点的chaoshi。我抬头一看，已见到天空上约隐约现的星光，城市的黑夜看不到的细节，要在山中感受。
「喂睇路！」你一手捉我，在我失平衡之际拉我。
「我都唔知原来真系睇到星」我还沉迷天上的星星。
「都要睇路架罗大佬」你的手仍在我手臂上。
「靠你啦，嘻嘻」
「下次唔救你」
「一齐跌罗」
「唔想理你，行啦，上去先睇」你还未放手，我也没有挣扎。
我们来到蒙民伟楼的天台，站在中大的半空，四周漆黑一片，没有了闹市的灯光，天空却反而更明亮。
「哗，我都唔记得咗上一次见到咁多星系几时」
「唔好乱咁带人黎呀，一阵夜晚呢度人生人海就大获架啦」
「系人都知架啦，不过系冇乜人夜晚行过嚟姐」
「咁都唔应该乱带人黎罗」你一再重调。
「因为净系可以比你带我黎？」我好像猜到了一点。
「唔明你讲咩喎」你却好像退後了一步。
抬头久了，颈部有点吃不消，我们索性躺在天台的水泥地上，看数之不尽的星空。夜渐深，瞳孔放大後的晚空，更为热闹，我把手放到你的手腕上，然後慢慢躲入你的掌心里。
***
以前是一片空旷的天台，现在有一半放中央冷气系统，可幸的是那个广场模样的开放空间还在。我看小孩吵闹地走到天台尽头，在冷气喉管旁捉迷藏。
「好啦果边玩紧果几个，要返黎啦，我地准备去第二个地方啦」我边说边向远处的小孩招手，叫他们回来。
「点呀？过唔过到呀？」我看准备跨过冷气喉管的小孩，他有点迟疑。
我伸出手，助他一把。